Астанада Орталық Азиядағы адами капиталды басқару жөніндегі IV халықаралық форум — Human Capital Days, Kazakhstan өтті. Форум жыл сайын HR саласының көшбасшыларын, мемлекеттік органдардың, бизнес пен білім беру саласының өкілдерін біріктіреді.
Форумның жарқын оқиғаларының бірі — жұмыс беруші бренді жайлы үздік тәжірибелерді атап өтетін халықаралық Employer Brand Eurasia марапатын табыстау. Биыл Alumni Program номинациясында АҚ «Нұрбанк» «Өмірге жолдама» әлеуметтік бастамасын табысты жүзеге асырғаны үшін жеңімпаз атанды.
«Өмірге жолдама» бағдарламасы (орыс тілінде — «Путевка в жизнь») 2014 жылы АҚ «Нұрбанк» акционері Елдар Сәрсеновтің бастамасымен іске қосылды. Бағдарлама Қазақстанның түкпір-түкпіріндегі балалар үйлері мен паналау орындарының түлектеріне Caspian University-де жоғары білім алуға мүмкіндік береді. Банк оқу, тұру, тамақ, жолақы және студенттердің жеке қажеттіліктері шығындарын толық өтейді. Менторлық қолдау мен жұмыспен қамтуға ерекше назар аударылады – түлектерге «Нұрбанкке» және банкпен аффилиирленген компанияларға жұмысқа орналасу кепілдендірілген.
«Он жылдан астам уақыт бойы «Өмірге жолдама» ата-ана қамқорлығынсыз қалған балаларға болашаққа маңызды қадам жасауға көмектесіп келеді. Нұрбанк командасы үшін бұл жай ғана жоба емес – бұл біздің миссиямыз. Біз балаларымыздың өсіп, білім алып, өзін тауып, армандарына нық қадам басып келе жатқанын көреміз. Олардың әрбір жетістігі өз «жолдамасына» мұқтаж тағы да талай балаға көмектесуді жалғастыруға шабыттандырады. Біз әрбір бала, оның өткені қандай болса да, қолдауға, білімге және лайықты өмір құру мүмкіндігіне лайық деп сенеміз», – деді АҚ «Нұрбанк» Басқарма төрайымы Гүлнара Мұсатаева.
Employer Brand Eurasia халықаралық қазылар алқасы «Өмірге жолдама» бағдарламасын өзектілігі, әлеуметтік маңызы, банк қызметкерлері мен серіктестерін тартатын бірегей форматы, сондай-ақ қатысушылар өміріне қосатын өлшенетін үлесі үшін жоғары бағалады. Жоба нақты әсері бар, тағдырларды өзгерте алатын тұрақты бастаманың үлгісі деп танылды.
«Көпшілігі біздің қандай тамаша жобамыз бар екенін тіпті білмейді. Бұл – адамдар туралы. Бәрін өзгерте алатын мүмкіндік туралы. Alumni Program номинациясында марапат алу – бұл тек бүкіл командамыздың көпжылдық әрі жанқиярлық еңбегіне берілген жоғары баға ғана емес, ересек өмірдің басында әсіресе қолдауға мұқтаж мүмкіндігінше көп жасқа көмектесуді жалғастыруға үлкен ынталандыру. Осы бағдарламаның түлегі әрі қазір оның кураторы ретінде мен оның құндылығын барлығынан жақсы түсінемін. Үшінші жыл қатарынан әр жаңа легпен жеке кездесемін. Біз сөйлесеміз, оқуға түсуге көмектесеміз, сұхбаттар өткіземіз», – деп бөлісті «Өмірге жолдама» бағдарламасының кураторы Аделина Жданова.
Іске қосылғаннан бері бағдарламаға елдің әр өңірінен 130 жас қатысты. Қатысушылар саны жыл сайын тұрақты өсіп келеді: 2024–2025 оқу жылында бағдарлама бойынша 24 студент білім алуда. Биыл тоғызыншы түлектер легі шығарылады – жаңа дипломдар мен ересек өмірге нағыз жолдамаларды тағы бірнеше жас қазақстандық алады. Жақында олардың орнын бәрі енді ғана басталатын жаңа қатысушылар басады.